ၼင်ႇႁုိဝ် ၵူၼ်းၼုမ်ႇ ၼင်ႇၵၼ် ေပႃးေတမီး လွင်ႈမိုတ်ႈၵိုဝ်းၸမ်ၸႂ်ၵၼ်မႃးလိူဝ်ၵဝ်ႇၼၼ်ႉ ယူႇတီႈ ၸုမ်းပိတ်ႉ မၢၵ်ႇၼင် ၵူၼ်းၼုမ်ႇဝၢၼ်ႈႁႆး ႄလႈ ၸုမ်းသယၢမ်တႆး ဝဵင်းလႃႈသဵဝ်ႈ ေၶႉၶဵင်ႇ ပိတ်ႉမၢၵ်ႇၼင် တီႈဝၢင်းမၢၵ်ႇၼင် ငဝ်ႈငုၼ်း SSPP/SSA ေၸႈဝဵင်းေၵးသီး ၸိုင်ႈတႆးပွတ်းၸၢၼ်း ။
ဝၼ်းထီႉ 1- 2 /6/2019 ၼၼ်ႉ ၸုမ်းၵူၼ်းၼုမ်ႇ ဝၢၼ်ႈႁႆး ဢိၵ်ႇတင်း လုၵ်ႈႁဵၼ်းေၼႃႇတႅၼ်းၶိူဝ်း ႄလႈ ၸုမ်းသယမ်တႆး ဝဵင်းလႃႈသဵဝ်ႈ ႄၽႁဵတ်း 4 ၸုမ်းေၶႉၶဵင်ႇ ပိတ်ႉမၢၵ်ႇၼင် သွင်ၸုပ်ႈ ၊ မိူဝ်ႈဝၼ်းထီႉ 1/06/2019 ယၢမ်းဝၢႆးဝၼ်း 4 မူင်း လႆႈၶႅင်ႇၵၼ်ၵမ်းၼိုင်ႈ ၸုမ်းၵူၼ်းၼုမ်ႇ ဝၢၼ်ႈႁႆး ေပႉ (2-0 ) ၵူဝ်း ။ ဝၼ်းထီႉ 2/6/2019 ၶၢဝ်းယမ်း ၵၢင်ၼႂ် 7း႐႐ – 9း႐႐ မူင်းၼၼ်ႉ ၸုမ်း ေၼႃႇတႅၼ်းၶိူဝ်း ဝၢၼ်ႈႁႆး ႄလႈ ၸုမ်းသယမ်တႆး လႃႈသဵဝ်ႈ လႆႈေၶႉၶဵင်ႇၵၼ်ေသ ၸုမ်းသယမ်တႆး ေပႉ( 2-1) ၵူဝ်းၵႂႃႇ ဝၢႆးေသသွင်ၽၢႆႇလဵၼ်ႈမၢၵ်ႇၼင်ၵၼ်ၵႂႃႇယဝ်ႉ မီးပၢင်ၵိၼ်ၶဝ်ႈႁူမ်ႈမူႇသုမ်လီၵၼ်ထႅင်ႈ ။
ၸၢႆးဝုၼ်း ၽူႈဢွၼ်ႁူဝ်ၸုမ်းၵူၼ်းၼုမ်း မၢၵ်ႇၼင်ႇ သယၢမ်တႆး လၢတ်ႈဝႃႈ “- ယိူင်းဢၢၼ်းႁဝ်းၶႃႈ ဢၼ်လႆႈမႃး ၶႅင်ႇပိတ်ႉ မၢၵ်ႇၼင် တီႈၵူၼ်းၼုမ်ႇႁဝ်းၶႃႈ တီႈငဝ်ႈငုၼ်း ဝၢၼ်ႈႁႆးၼႆႉ ပိူဝ်ႈႁႂ်ႈၵူၼ်းၼုမ်ႇ ႁဝ်းၶႃႈ ေပႃးေတၵၢင်းယၢၼ် ေၽးၶဵၼ်ယႃႈမဝ်းၵမ် ၊ ထႅင်ႈလွင်ႈၼိုင်ႈေၵႃႈ တႃႇႁႂ်ႈၵူၼ်းၼုမ်ႇ ႁဝ်းၶႃႈ ၼင်ႇၵၼ် မီးလွင်ႈမုိတ်ႈၵိုဝ်းၸမ်ၸႂ် ႁႂ်ႈပဵၼ်ပႃး ၽွၼ်းလီပၢႆးယူႇလီ ၸိူဝ်းၼႆႉၶႃႈေဢႃႈ ” ဝႃႈၼႆ ။
ၼင်ႇႁိုဝ်ၵူၼ်းၼုမ်ႇ လၢႆတီႈလၢႆတၢင်း ေပႃးေတမီးလွင်ႈမိုတ်ႈၵိုဝ်းၸမ်ၸႂ်ၵၼ် မီးလွင်ႈၶဝ်ႈဢွၵ်ႇၵွင်ႉ သၢၼ်ၵၼ် ႁဵတ်းၵၢၼ်ၵႂႃႇမိူဝ်းၼႃႈ ၊ ႁႂ်ႈၵူၼ်းၼုမ်ႇ ၵၢင်လွတ်ႈယႃႈမဝ်းၵမ် ၊ ႁႂ်ႈပၢႆးယူႇလီၶႅမ်းတိူဝ်းၼႆေသ ယူႇတီႈ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းတပ်ႉသိုၵ်းၸိုင်ႈတႆး လႆႈၸတ်းႁဵတ်းပၢင်ၶႅင်ႇပိတ်ႉ မၢၵ်ႇၼင်ႇၵူၼ်းၼုမ်ႇမႃးယူႇၵူႈပီ မိူဝ်ႈၼႃႈမႃႈေၵႃႈ ပိူဝ်ႈႁႂ်ႈၵူၼ်းၼုမ်ႇ ေပႃးေတမီးလွင်ႈၸမ်ၸႂ် ၶဝ်ႈဢွၵ်ႇၵၼ်ၵႂႃႇၼၼ်ႉ တိုၼ်းေတၶတ်းၸႂ် ႁဵတ်းသၢင်ႈၵႂႃႇယူႇ ဝႃႈၼႆ။
