ၶၢဝ်ႇ-SSPP/SSA
2019 Jun (26)
ပၢင်ပိတ်ႉမၢၵ်ႇၼင် မိုတ်ႈၵိုဝ်းၸမ်ၸႂ် ၵူၼ်းၼုမ်ႇဝဵင်းပၢင်လူင်လႄႈ ၵူၼ်းၼုမ်ႇဝၢၼ်ႈႁႆး လႆႈၸတ်း ႁဵတ်းၵႂႃႇ တီႈဝၢင်းလဵၼ်ႈမၢၵ်ႇၼင်ႇ ဝၢၼ်ႈႁႆး ၸေႈဝဵင်းၵေးသီး ၸိုင်ႈတႆးပွတ်းၸၢၼ်း။
ဝၼ်းထီႉ 24.6.2019 ယၢမ်း (4:00)မူင်းတၢမ်းၶမ်ႈၼၼ်ႉ ၸုမ်းၵူၼ်းၼုမ်ႇ ဝဵင်းပၢင်လူင်လႄႈ ၸုမ်းၵူၼ်း ၼုမ်ႇ ဝၢၼ်ႈႁႆး လႆႈတႄႇလဵၼ်ႈမၢၵ်ႇၼင်ႇ သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ၸုမ်းၵူၼ်းၼုမ်ႇပၢင်လူင် လႆႈ(1)ၵူဝ်း ၼႂ်းယၢမ်းတွၼ်ႈ(1)ဢွၼ်တၢင်း၊ ထိုင်ယၢမ်းတွၼ်ႈ(2)မႃး ၸုမ်းၵူၼ်းၼုမ်ႇဝၢၼ်ႈႁႆး လႆႈ(1) လုၵ်ႈသေ ၽၢႆႇလႂ်ဢမ်ႇပေႉၽႂ်။
ၵၢင်ၶမ်ႈမႃး မီးပၢင်ၵိၼ်ၶဝ်ႈသုမ်လီၵၼ်သေ ႁူဝ်ပဝ်ႈလူင် SSPP/SSA ၸွမ်သိုၵ်းလူင် ၸဝ်ႈပၢင်ႇၾႃႉ မီးငိုၼ်းတွၼ်ႈသူးထိုင် ၸုမ်းၵူၼ်းၼုမ်ႇလဵၼ်ႈမၢၵ်ႇၼင် ၵႂႃႇယူႇဝႃႈၼႆ။
ဝၼ်းထီႉ 25.6.2019 ယၢမ်း(07:00)မူင်း ၵၢင်ၼႂ် ၸုမ်းၵူၼ်းၼုမ်ႇ ဝဵင်းပၢင်လူင်လႄႈ ၸုမ်းလုၵ်ႈႁဵၼ်း ၼေႃႇတႅၼ်းၶိူဝ်း ၶေႉၶဵင်ႇၵၼ် ၸုမ်းၵူၼ်းၼုမ်ႇဝဵင်းပၢင်လူင် လႆႈ(2)လုၵ်ႈ၊ ၸုမ်းလုၵ်ႈႁဵၼ်းၼေႃႇ တႅၼ်းၶိူဝ်း လႆႈ(3)လုၵ်ႈလႄႈလုၵ်ႈႁဵၼ်းၼေႃႇတႅၼ်းၶိူဝ်း ပေႉၵႂႃႇ(1)လုၵ်ႈယူႇယဝ်ႉ။
တီႈပၢင်လဵၼ်ႈမၢၵ်ႇၼင်ႇမိုတ်ႈၵိုဝ်းၸမ်ၸႂ်ၵၼ်ၼၼ်ႉ ၸၢႆးၽူးလူႇ တၢင်တူဝ်ၵူၼ်းၼုမ်ႇ ငဝ်ႈငုၼ်းပႃႇ တီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးသေ မွၵ်ႇလၢတ်ႈၶေႃႈၵႂၢမ်းငိၼ်းၸူမ်း ၸုမ်းၵူၼ်းၼုမ်ႇ လဵၼ်ႈ မၢၵ်ႇၼင်ဝဵင်းပၢင်လူင်သေ လႆႈတွၼ်ႈသူး ၼမ်ႉၸႂ်ၵႂႃႇယူႇယဝ်ႉ။
