ၶၢဝ်ႇ-SSPP/SSA
2019 Jun(20)
ၵူၼ်းမိူင်းဝၢၼ်ႈၼႃးတေႃ၊ ဝၢၼ်ႈၼႃးလၢင်း တူင်ႇဝဵင်းသီႇပေႃႉလႄႈ ၵူၼ်းဝၢၼ်ႈႁၢင်ၼႃး ၸေႈဝဵင်းလႃႈ သဵဝ်ႈ ဢွၼ်ၵၼ်ၽုၵ်ႇတူၼ်ႈမႆႉသၵ်း မႆႉမွၵ်ႇၸီႇလီႇ ႁႂ်ႈပဵၼ်တႃႇၵမ်ႉယွင် ၵၢၼ်ထိင်းသိမ်းထိူၼ်ႇပႃႇမႆႉ ၼႆယဝ်ႉ။
ဝၼ်းထီႉ 18.6.2019 ယၢမ်း(10:00)မူင်းၵၢင်ၼႂ် ၵူၼ်းဝၢၼ်ႈၼႃးတေႃႇ ဢိူင်ႇၼႃးၼိဝ်ႉ ၸေႈဝဵင်းသီႇ ပေႃႉ ၸူႉၶွၼ်ႈႁႅင်းၵူၼ်းဝၢၼ်ႈသေ ဢွၼ်ၵၼ်ၽုၵ်ႇတူၼ်ႈမႆႉသၵ်း တႃႇ(1)ဢေႇၵ၊ ဢိၵ်ႇပႃးတူၼ်ႈမႆႉ မွၵ်ႇၸီႇလီႇတင်းၼမ်။
ဝၼ်းထီႉ 19.6.2019 ယၢမ်း(08:00)မူင်းၵၢင်ၼႂ်ၼၼ်ႉ လုင်းသၢင်ႇမၼ်ႈ ၽူႈဢွၼ်ႁူဝ်ဝၢၼ်ႈၼႃးလၢင်း ဢွၼ်ႁူဝ်ၵူၼ်းဝၢၼ်ႈ(43)ၵေႃႉ ၽုၵ်ႇတူၼ်ႈမႆႉမွၵ်ႇၸီႇလီႇ (460)တူၼ်ႈ ႁိမ်းသဵၼ်ႈတၢင်းလူင် သီႇပေႃႉ လႃႈသဵဝ်ႈ ဢိူင်ႇၼွင်မွၼ် ၸေႈဝဵင်းလႃႈသဵဝ်ႈ၊ တီႈဝၢၼ်ႈႁၢင်ၼႃးၵေႃႈ လုင်းသၢင်ႇဢေႃး ၽူႈဢွၼ်ႁူဝ်ၼႃႈဝၢၼ်ႈ ဢွၼ်ႁူဝ်ႁႅင်းၵူၼ်းဝၢၼ်ႈ(30)ၵေႃႉသေ ၽုၵ်ႇတူၼ်ႈမႆႉမွၵ်ႇၸီႇလီႇ(830) တူၼ်ႈ ၽၢႆႇႁွင်ႇဝၢၼ်ႈႁၢင်ၼႃး ယူႇယဝ်ႉ။
ၵၢၼ်ၽုၵ်ႇတူၼ်ႈမႆႉၼႆႉ ယိူင်းဢၢၼ်းပိူဝ်ႈတႃႇ ထိင်းသိမ်းထိူၼ်ႇၶိူဝ်းပႃႇမႆႉသေ တီႈငဝ်ႈငုၼ်းပႃႇတီႇမႂ်ႇ သုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႆႈတမ်းၽႅၼ်ၵၢၼ် ပၼ်ပုၼ်ႈၽွၼ်းၽၢႆႇဢုပ်ႉပိူင်ႇ ဢွၼ်ႁူဝ်တမ်းၽႅၼ်ႁဵတ်းသၢင်ႈၵႂႃႇယူႇယဝ်ႉ။ ၽူႈၸတ်းၵၢၼ်ၸေႈဝဵင်းမၢႆ(10) SSPP/SSA ဢွၼ်ႁူဝ် ၸတ်းၵၢၼ် ၵူႈဝၢၼ်ႈၼႂ်းၼႃႈၸေႈဝဵင်းမၢႆ(10) ၸေႈတွၼ်ႈမၢႆ(4) တင်းသဵင်ႈ ဢၼ်လႆႈမႃးတူၼ်ႈမႆႉ ၵူႈ မဵဝ်းမဵဝ်း တႃႇၼႃႈဝၢၼ်ႈၽႂ်မၼ်းၼၼ်ႉ တိုၼ်းတေလႆႈဢွၼ်ၵၼ်ၽုၵ်ႇၵႂႃႇၼႆယူႇယဝ်ႉ။
