ၶၢဝ်ႇ-SSPP/SSA
2019 Jun(2)
ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၸွႆႈထႅမ်ၵူၼ်းမိူင်း ၸိူဝ်းလႆႈထူပ်းၽေး သၽႃႇဝႃႉ တီႈဝၢၼ်ႈလွႆလႅင် ဢိူင်ႇဝၢၼ်ႈဝႃႉ ၸေႈဝဵင်းၵေးသီးလႄႈၸွႆႈထႅမ် တႃႇမႄးၵုမ်းလုမ်းလႃး ဝတ်ႉၵျွင်းမိူင်းၵွင် ၸေႈဝဵင်းမိူင်းယႆ။
ဝၼ်းထီႉ 30.5.2019 ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႆႈပွႆႇ ၽူႈတၢင်တူဝ် ၵႂႃႇၸွႆႈထႅမ်ၵူၼ်းမိူင်း ဝၢၼ်ႈလွႆလႅင် ဢိူင်ႇဝၢၼ်ႈဝႃႉ ဢၼ်ထုၵ်ႇလူမ်းလႅင်ႉပတ်ႉႁိူၼ်းလူႉ လႅဝ်ၵႂႃႇ(3)လင် မိူဝ်ႈဝၼ်းထီႉ 22.5.2019 ယၢမ်း 14:30 မူင်းၼၼ်ႉ လူမ်းႁႅင်းၼႃႇလႄႈ ႁိူၼ်းလုင်းၵျီႇ+ ပႃႈၵူႇ၊ ႁိူၼ်းလုင်းၶွင်ႇ+ပႃႈၼူႉ၊ ႁိူၼ်းလုင်းလူး+ပႃႈယူၺ်း ၶဝ်လႆႈလူႉလႅဝ် လဵၵ်းမုင်းပိဝ်၊ ၽႃႇႁိူၼ်း ၵၢၼ်ႉယၢတ်ႇ ၸိူဝ်းၼႆႉ လႆႈၸွႆႈထႅမ်ငိုၼ်း တႃႇၶိုၼ်းၵုမ်းႁႂ်ႈယူႇလႆႈၼၼ်ႉ 300,000 ပျႃးယူႇယဝ်ႉ။
ၸဝ်ႈႁိူၼ်းဢၼ်လႆႈႁပ်ႉတၢင်းၸွႆႈထႅမ်လၢတ်ႈဝႃႈ“ဢၼ်ငဝ်ႈငုၼ်းႁဝ်းၶႃႈ မႃးၸွႆႈထႅမ်ႁဝ်းၶႃႈ ၼႆႉ ပဵၼ်ဢၼ်ငိၼ်းၸူမ်းဢမ်ႇသုတ်းဢမ်ႇသဵင်ႈလႆႈယဝ်ႉၶႃႈ၊ ပေႃးဢမ်ႇၼၼ် တႃႇႁိူၼ်းႁဝ်းၶႃႈ ဢၼ် လူႉၵႂႃႇၼႆႉ ပေႃးတေလီယူႇၶိုၼ်းမိူၼ်ၵဝ်ႇၼၼ်ႉ သင်ဢမ်ႇလႆႈႁပ်ႉတၢင်းၸွႆႈထႅမ်တီႈၵူၼ်းလူင်ႁဝ်းၶႃႈ ၸိုင် ႁဝ်းၶႃႈတေလႆႈၸႂ်ႉၶၢဝ်းယၢမ်းႁိုင် ၼင်ႇႁိုဝ်ႁဝ်းၶႃႈပေႃးတေလႆႈယူႇႁိူၼ်းမိူၼ်ၵဝ်ႇၼၼ်ႉ ငိၼ်း ၸူမ်းၶွပ်ႈၸႂ်တေႉတေႉယဝ်ႉၶႃႈ”ဝႃႈၼႆ။
မိူဝ်ႈဝၼ်းထီႉ 1.6.2019 ၼၼ်ႉ ၽူႈမီးပုၼ်ႈၽွၼ်းၽၢႆႇဢုပ်ႉပိူင်ႇ လႆႈတၢင်တူဝ် ငဝ်ႈငုၼ်းပႃႇ တီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA သေ ၸွႆႈထႅမ်ငိုၼ်း 1,500,000(သိပ်းႁႃႈသႅၼ်) ပျႃး တႃႇၶိုၼ်းမေးၵုမ်းလုမ်းလႃး ဝတ်ႉပိတ်ႉၸေး 24 တီႈဝၢၼ်ႈမိူင်းၵွင် ၸေႈဝဵင်းမိူင်းယႆယူႇယဝ်ႉ။
ဢိင်ၼိူဝ်လွင်ႈလႆႈၸတ်းၽူႈတၢင်တူဝ် လူင်းၸွႆႈထႅမ်ၵူၼ်းမိူင်းသေ ၵူၼ်းလူင်ၼႂ်းၵေႃႇမတီႇ ငဝ်ႈငုၼ်း SSPP/SSA ၸဝ်ႈၼိုင်ႈလၢတ်ႈဝႃႈ“တႃႇၸွႆႈထႅမ်ပေႃႈမႄႈၵူၼ်းမိူင်း ၸိူဝ်းမီးတၢင်းယၢပ်ႇ ၼၼ်ႉ မုၵ်ႉၸုမ်းႁဝ်းၶႃႈ တိုၼ်းတမ်းဝၢင်းၽႅၼ်ၵၢၼ်သေ ၸွႆႈထႅမ်ပူၵ်းပွင်ပၼ် ၵႃႈၼင်ႇပွင်ပဵၼ်လႆႈ ယူႇ”ၼႆယဝ်ႉ။
