ၶၢဝ်ႇ-SSPP/SSA
2019 Jun (25)
သင်ႇၶႃႇၸဝ်ႈ(6)ဝိႁၢရ်ႇ ၼႂ်းဢိူင်ႇၼႃးၼိဝ်ႉ ဢွၼ်ႁူဝ်ၼမ်းၼႃႈ ပေႃႈမႄႈၵူၼ်းမိူင်း ဢိၵ်ႇပႃး ၽူႈမီးပုၼ်ႈၽွၼ်းၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးသေ ၸတ်းႁဵတ်းပၢင်ၵုမ် ႁူဝ်ႁိူၼ်းၸႅၼ်ႇ တီႈဝိႁၢရ်ႇပၢင်ၵွၵ်ႇ ဢိူင်ႇၼႃးၼိဝ်ႉ ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 24.6.2019 ယၢမ်း(09:29)မူင်း တေႃႇယၢမ်း(03:19)မူင်းၼၼ်ႉ လႆႈဢွၼ်ၵၼ်ႁဵတ်းပၢင်ၵုမ် ဢုပ်ႇဢူဝ်းသပ်းလႅင်း လွင်ႈၵၢၼ်သႃႇသၼႃႇတေႁိူဝ်ႈႁိူင်း၊ လွင်ႈၵၢၼ်ပၢႆးပိင်ႇၺႃႇ၊ လွင်ႈၵၢၼ်ဢုပ်ႉပိူင်ႇ ၸိူဝ်းၼႆႉယူႇယဝ်ႉ။
သြႃႇၸဝ်ႈဢၼ်ၶဝ်ႈႁူမ်ႈၼႂ်းပၢင်ၵုမ် ပႃးၼိုင်ႈလၢတ်ႈသပ်းလႅင်းဝႃႈ“ၵွပ်ႈႁဝ်းပဵၼ် ၸၢဝ်းၶိူဝ်းပုတ်ႉထ ယုမ်ႇယမ်ပိုင်ႈၵိူဝ်းလီ ၵျၢင်ႉၵမ်ၸွမ်းသဵၼ်ႈတၢင်းပုတ်ႉထၸဝ်ႈလႄႈ ၸမ်တေၶဝ်ႈဝႃႇယဝ်ႉ ၸွမ်းၼင်ႇ ၵၢၼ်သႃႇသၼႃႇ ဢၼ်လူဝ်ႇႁဵတ်းၼၼ်ႉ ယႃႇလူင်လိုမ်း၊ ၸိူဝ်းဢႃႇယူႉၶၢဝ်ႉၵေႇၵေႃႈ လူဝ်ႇဢွၼ်ၵၼ် ၵမ်သိၼ်ၼွၼ်းၵျွင်း၊ ပၢင်ပွႆးႁႅၼ်းလူႇၼႂ်းဝႃႇၵေႃႈ ယႃႇဢဝ်ပဵၼ်ပၢင်မူၼ်ႈပၢင်သိူဝ်းလၢႆလၢႆ”ၼႆ တိုၵ်း သူၼ်းၼင်ႇၼႆယူႇ။
ၽူႈၸတ်းၵၢၼ်ၸေႈဝဵင်းမၢႆ(10) ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး မွၵ်ႇလၢတ်ႈဝႃး“တီႈဝိႁၢရ်ႇ ၵူႈတီႈ တုၵ်းယွၼ်းႁႂ်ႈသြႃႇၸဝ်ႈႁဝ်းၶဝ် သွၼ်ပၼ်လိၵ်ႈၸဝ်ႈသၢင်ႇ၊ ၼင်ႇႁိုဝ်ပေႃးတေၸၢင်ႈပူင်သွၼ် လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈလႆႈၼၼ်ႉ ႁူင်းႁဵၼ်းၸိူဝ်းဢၼ်ဢမ်ႇမီးမေႃသွၼ်လိၵ်ႈတႆးၼၼ်ႉ ႁႂ်ႈပၼ်သဵၼ်ႈမၢႆ ၼႂ်းဝၼ်းထီႉ 30.6.2019 ၼႆႉဝႆႉပဵၼ်လိုၼ်းသုတ်း တီႈလုမ်းၸေႈဝဵင်းတေတၢင်ႇယွၼ်း ၽၢႆႇၼိူဝ်၊ ၵူႈဝၢၼ်ႈဢွၼ်ၵၼ်လုမ်းလႃးႁေႃၸဝ်ႈမိူင်း ႁႂ်ႈမီးလွင်ႈမူတ်းသႂ်တႃႇသေႇ၊ ၸွမ်းဝၢၼ်ႈၽႂ်မၼ်း ၵေႃႈ လူဝ်ႇဢွၼ်ၵၼ်တီႇၽဵဝ်ႈ ယႃႇပၼ်မီးယုမ်းမီးယွမ်ႇ ႁႂ်ႈပဵၼ်တီႈယူႇယုင်း ဢၼ်ၸၢင်ႈႁဵတ်းႁႂ်ႈၵူၼ်း ပဵၼ်တၢင်းပဵၼ်ၼၢဝ်ၼူၵ်ႉ”ၸိူဝ်းၼႆႉယူႇယဝ်ႉ။
သိုပ်ႇလၢတ်ႈထႅင်ႈဝႃႈ“ၵူၼ်းၼုမ်ႇၸၢႆး/ယိင်း ယႃႇပေဢွၼ်ၵၼ်ယွမ်ႉၶူၼ်ႁူဝ်လႅင် မၼ်းတုမ်ႉတိူဝ်ႉပၢႆး ယူႇလီ၊ ၸၢင်ႈပဵၼ်တႃႇမွတ်ႇယွၼ်ႉမၼ်း၊ မိူဝ်ႈပဵၼ်ပွႆးၵေႃႈ တေဢမ်ႇလႆႈပႃးမိတ်ႈ ပႃးလႅဝ်းၶဝ်ႈပွႆးလႃး လႃး၊ ၵူၼ်းမိူင်းတေဢမ်ႇလႆႈယိပ်းၵွင်ႈမၢၵ်ႇလဵၵ်းမၢၵ်ႇတွင်း”ၼႆ သပ်းလႅင်းၵႂႃႇၵႂၢင်ႈၶႂၢင်ယူႇယဝ်ႉ။
တီႈၼႂ်းပၢင်ၵုမ်ၼၼ်ႉ သင်ႇၶႃႇၸဝ်ႈ(11)ပႃး ဢွၼ်ႁူဝ်ၼမ်းၼႃႈ ၽူႈမီးပုၼ်ႈၽွၼ်းၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးလႄႈပေႃႈမႄႈၵူၼ်းမိူင်း ႁႅင်းၵူၼ်း(900)ပၢႆသေ ႁဵတ်းသၢင်ႈ ဢွင်ႇမၢၼ်ၵႂႃႇလီငၢမ်းယူႇယဝ်ႉ။
