ၶၢဝ်ႇ-SSPP/SSA
2019 Jun(13)
ၽူႈၸတ်းၵၢၼ်ၸေႈဝဵင်းမၢႆ(9) SSPP/SSA ဢွၼ်ႁူဝ်ၵၢပ်ႈသွမ်းသင်ႇၶႃႉၸဝ်ႈ လူႇတၢၼ်းယိူင်း ၸူး ဝၼ်းပိုတ်ႇႁူင်းယႃပေႃႈမႄႈၵူၼ်းမိူင်း တီႈဝၢၼ်ႈၼႃးပႅင် ဢိူင်ႇဝၢၼ်ႈပၢၼ်း ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 12.6.2019 ယၢမ်း 07:00 မူင်းၵၢင်ၼႂ်ၼၼ်ႉ ၵႅမ်ၶုၼ်ႁၢၼ် ၸၢႆးၵေႃးလိင်ႇ ၽူႈၸတ်းၵၢၼ်ၸေႈဝဵင်းမၢႆ(9) SSPP/SSA ဢွၼ်ႁူဝ်လူႇတၢၼ်းၵၢပ်ႈသွမ်းသင်ႇၶႃႉၸဝ်ႈ တီႈႁူင်းယႃမႂ်ႇ ဢၼ်မီးယိူင်းဢၢၼ်းတႃႇပူၵ်းပွင်ပၢႆးယူႇလီပေႃႈမႄႈၵူၼ်းမိူင်း၊ တီႈဢၼ်လူင်ပွင်ၸိုင်ႈ ဢမ်ႇတူၺ်းထိုင်လႆႈ ပၢႆးယူႇလီပေႃႈမႄႈၵူၼ်းမိူင်းၼၼ်ႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA သေၶတ်းၸႂ်ၵေႃႇသၢင်ႈပူၵ်းပွင်ပၼ် ပေႃႈမႄႈၵူၼ်းမိူင်းၵႂႃႇယူႇယဝ်ႉ။
ၽူႈၸတ်းၵၢၼ် ပွင်ပဵၼ်ႁူင်းယႃၵေႃႉၼိုင်ႈလၢတ်ႈဝႃႈ“ႁူင်းယႃႁဝ်းၶႃႈၼႆႉ တူၺ်းထိုင်ပၼ်လႆႈ ပၢႆးယူႇလီမႄႈပႃးတွင်ႉ၊ ႁဵတ်းပဵၼ်မႄႈၵဵပ်း၊ လုမ်းလႃးမႄႈလုၵ်ႈဢွၼ်ႇ၊ တူၺ်းထိုင်ပၼ်ပၢႆးယူႇလီ လုၵ်ႈဢွၼ်ႇ ဢႃႇယူႉ(5)ၶူပ်ႇလူင်းတႂ်ႈ၊ ယူတ်းယႃပၼ် တၢင်းပဵၼ်ပွတ်ႇ၊ တၢင်းပဵၼ်ၼၢဝ်ၼူၵ်ႉ၊ လုမ်းလႃးမႄႈပႃးတွင်ႉလဵင်ႉလုၵ်ႈယၢပ်ႇ၊ လုၵ်ႈဢွၼ်ႇပဵၼ် တၢင်းပဵၼ်ၶိုၵ်ႉၶၢၵ်ႉၸိူဝ်းၼႆႉ ဝႆႉပဵၼ်ပိူင်ယႂ်ႇ သေ တေတူၺ်းထိုင်ယူတ်းယႃပၼ်ၵႂႃႇယူႇ”ဝႃႈၼင်ႇၼႆ။
ၵၢၼ်ၵေႃႇသၢင်ႈၸွႆႈထႅမ်ပၼ်ႁူင်းယူတ်းယႃၵူၼ်းမိူင်းၼႆႉ ဢမ်ႇၵႃးတီႈဝၢၼ်ႈၼႃးပႅင်ၵူၺ်း တီႈၼႂ်းၸေႈဝဵင်း တၢင်ႉယၢၼ်း၊ ၸေႈဝဵင်းမိူင်းသူႈ၊ ၸေႈဝဵင်းမိူင်းၼွင်၊ ၸေႈဝဵင်းၵေးသီး ၸိူဝ်းၼႃႈတီႈႁၢင်ႇၵႆဝဵင်းသေ မီးလွင်ႈယၢပ်ႇၽိုတ်ႇတႃႇၵႂႃႇၸူးႁူင်းယူတ်းယႃၼၼ်ႉ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး တမ်းဝၢင်းၽႅၼ်ၵၢၼ် တႃႇၵေႃႇသၢင်ႈပၼ် ဢွင်ႈယူတ်း ယႃပေႃႈမႄႈၵူၼ်းမိူင်း ၵႃႈၼင်ႇပွင်ပဵၼ်လႆႈယူႇယဝ်ႉ။
