ၶၢဝ်ႇ-SSPP/SSA
2019 May(30)
ၽၢႆႇဢုပ်ႉပိူင်ႇ ၸေႈဝဵင်းမၢႆ(25) ၵူတ်ႇထတ်းတီႉၺွပ်းၵူၼ်း ၵဵဝ်ႇၶွင်ႈယႃႈမဝ်းၵမ် ၼႂ်းဢိူင်ႇၼႃး မၢၵ်ႇၶေႃ ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 29.5.2019 ၼၼ်ႉ ၵေႃႇမတီႇၽဵဝ်ႈမူၺ်ႉယႃႈမဝ်းၵမ် ၼႂ်းၼႃႈတီႈၸေႈဝဵင်းမၢႆ(25) ၸေႈတွၼ်ႈမၢႆ(4) ၵႂႃႇတီႉမတ်ႉၵူၼ်းယွင်ႇယႃႈ ၸိုဝ်ႈသဵင် ၸၢႆးၼူႉ ဢႃႇယူႉ(48)ၶူပ်ႇ တီႈယူႇဝၢၼ်ႈ ၵဵတ်းၾူၼ် ဢိူင်ႇၼႃးမၢၵ်ႇၶေႃ ယွၼ်ႉယွင်ႇယႃႈသေၽိတ်းၵူၼ်းဝၢၼ်ႈလႄႈၸင်ႇလႆႈ တီႉမတ်ႉၼႆ ယဝ်ႉ။ ၼႂ်းဝၼ်းလဵဝ်ၵၼ်ၼင်ႇၵဝ်ႇ ၽူႈၸတ်းၵၢၼ်ၸေႈဝဵင်းမၢႆ(25) လႆႈၸတ်းၽၢႆႇႁူမ်ႇလူမ်ႈ ၵႂႃႇတီႉမတ်ႉ လုင်းၺုၼ်ႉမွင်ႇ ဢႃႇယူႉ(48)ၶူပ်ႇ ယူႇဝၢၼ်ႈႁူဝ်ၼႃး ဢိူင်ႇၼႃးမၢၵ်ႇၶေႃ ၵွပ်ႈပိူဝ်ႈၵိၼ် လဝ်ႈမၢဝ်းၵဝ်း၊ သူႇပႃးယႃႈမႃႉယဝ်ႉ ၽိတ်းလုၵ်ႈၽိတ်းမေး ပေႃႉၶူဝ်းႁိူၼ်းၽိူၼ်ဝၢၼ်ႇ လႄႈလႆႈတီႉ မတ်ႉဢဝ်လိူင်ႈၵၢၼ်။
ၶုၼ်သိုၵ်း ၸၢႆးသူႉ ၽူႈၵွၼ်းတပ်ႉၵွင်(729) လႆႈၸတ်းၵူၼ်းသိုၵ်းၵႂႃႇတီႉမတ်ႉ ၵူၼ်းၶၢႆယႃႈမႃႉ ၸိုဝ်ႈလုင်းသၢမ် ဢႃႇယူႉ(52)ၶူပ်ႇ တီႈယူႇဝၢၼ်ႈၼႃးလေႃႉ ဢိူင်ႇသီႇထွၵ်ႇ ၸေႈဝဵင်းသီႇပေႃႉ တီႉလႆႈပႃး ယႃႈမႃႉ 50 မဵတ်ႉ၊ သူႇယႃႈမႃႉမီးၶၢဝ်းတၢင်း (5)ပီႊပၢႆ၊ သူႇသမ်းယႃႈၽိူၵ်ႇမီးမႃး(5)ပီႊပၢႆ၊ သူႇယႃႈလမ် လႆႈ ၶၢဝ်းတၢင်း(30)ပီႊပၢႆ လႆႈႁူႉၼင်ႇၼႆ။
မိူဝ်ႈဝၼ်းထီႉ 28.5.2019 ယၢမ်း 21:00 မူင်းၵၢင်ၶမ်ႈၼၼ်ႉ ၽူႈၸတ်းၸေႈဝဵင်းမၢႆ(10) ဢွၼ် ႁူဝ် လူင်းပိုၼ်ႉတီႈၵူတ်ႇထတ်းၼိူဝ်သဵၼ်ႈတၢင်း ဝူင်ႈၵၢင်ဝၢၼ်ႈၼႃးလွႆလႄႈဝၢၼ်ႈၼမ်ႉၼိဝ်ႉ ဢိူင်ႇ ႁၢင်ၼႃး ၸေႈဝဵင်းလႃႈသဵဝ်ႈၼၼ်ႉ တီႉလႆႈၶိူင်ႈသူႇယႃႈမႃႉ တီႈတူဝ် ၸၢႆးပႃႉ ဢႃႇယူႉ(39)ၶူပ်ႇ ယူႇဝၢၼ်ႈ ၼႃးလွႆ၊ လိူဝ်ၼၼ်ႉဢမ်ႇၵႃး ၸၢႆးပႃႉၼႆႉ လူၼ်ႉလိူဝ်ပၵ်းပိူင်လၵ်းမၢႆၼႂ်းဝၢၼ်ႈ ၽူႈယႂ်ႇၵူၼ်းလူင်ၼႂ်း ဝၢၼ်ႈၵေႃႈဝႃႈ ႁႂ်ႈဢဝ်သင်ႇသွၼ်မူၼ်ႉမႄးပၼ်ၼႆလႄႈ လႆႈဢဝ်သႂ်ႇၶွၵ်ႈၶင်မူၼ်ႉမႄးတူဝ်ဝႆႉယူႇယဝ်ႉ။
ၵဵဝ်ႇၵပ်းၵၢၼ်ၽဵဝ်ႈမူၺ်ႉယႃႈမဝ်းၵမ်ၼႆႉ ၸွမ်းၼင်ႇပိူင်ၵၢၼ် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး တမ်းဝၢင်းမီးဝႆႉ ၸိူဝ်းပဵၼ်ၽူႈၸတ်းၵၢၼ်ၸေႈတွၼ်ႈ၊ ၽူႈၸတ်းၵၢၼ်ၸေႈဝဵင်း ႁဝ်းၶဝ် တိုၼ်းတေထတ်းႁႃ ဢဝ်လိူင်ႈၵၢၼ်ၵႂႃႇတိၵ်းတိၵ်းယူႇယဝ်ႉ။
