လုၵ်ႈလွႆလဵၷ်း
ဝၼ်းထီ့-30-05-2019
ၽူႈၸတ်းၵၢၼ်ၸေႈဝဵင်း မၢႆ(10) ၽၢႆႇဢုပ့်ပိူင်ႇ ပႃတီႇမႂ်ႇသုင်ၸိုင်ႈတႆး တပ့်သိုၵ်းၸိုင်ႈတႆး ဢွၼ်ႁူဝ် ၵေႃႇမတီႇၸေႈဝဵင်း သေလူင်းႁူပ့်ထူပ်းၵူၼ်းမိူင်း လိူၵ်ႈတင်ႈပၼ်ၵေႃႇမတီႇဢိူင်ႇ တီႈဝၢၼ်ႈမၢၵ်ႇၶေႃ မုင်းမိူင်း ဢိူင်ႇႁၢင်ၼႃး ၸေႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ ၵူၼ်းမိူင်းၶိုၼ်ႈႁွတ်ႈ ႁိမ်းၸမ်ႁဵင် ။
ဝၼ်းထီ့ 29-05-2019 ၶၢဝ်းယၢမ်း ၵၢင်ၼႂ် 9:00 မူင်း ထိုင် ဝၢႆးဝၼ်း 3:00 မူင်းၼၼ့် ယူႇတီႈ ၽူႈၸတ်း ၵၢၼ် ၸေႈဝဵင်း ဢွၼ်ႁူဝ်သေ လူင်းႁူပ့်ထူပ်းၵူၼ်းမိူင်း ဢိူင်ႇႁၢင်ၼႃး ၼႃႈတီႈၵုမ်ၵမ် ပႃႇတီႇမႂ်ႇသုင်ၸိုင်ႈတႆး တပ့်သိုၵ်းၸိုင်ႈတႆး SSPP/SSA ၊ ၵဵဝ်ႇလူၺ်ႈ ဢဝ်သဵင်ၵၢင်ၸႂ်ၵူၼ်းဝၢၼ်ႈသေ တွတ်ႈၶႅပ်း ၵၢင်ၸႂ် လိူၵ်ႈတင်ႈ ၶွတ်ႇၽွတ်ႈပၼ် ၵေႃႇမတီႇဢိူင်ႇ ၵွၼ်းဢိူင်ႇ ႁၢင်ၼႃး လႆႈ 7 ၵေႃ့ ၊ ဢမ်ႇၵႃး တိုၵ်းသူၼ်း ပႃးလွင်ႈမူတ်းသႂ် ၼႂ်းဝၢၼ်ႈ ၼႂ်း ဢိူင်ႇ ၊ ႁႂ်ႈထိင်းသိမ်းပၼ် လွင်ႈယုၵ်းယၢၵ်း ႁႂ်ႈဝႆ့ပၼ်ထူင် ၸွမ်းၼႂ်းဝၢၼ်ႈ တႃႇသႂ်ႇယုၵ်းယၢၵ်း တေဢမ်ႇ လႆႈပႅတ်ႇဝၢၵ်ႇဝိူဝ် ၊ လွင်ႈၵႃ့ၶၢႆသူႇသမ်းယႃႈမဝ်းၵမ် တိုၼ်း တေဢမ်ႇလႆႈႁဵတ်း လႃးလႃး လုၵ့်တီႈ ၸုမ်းၽဵဝ်ႈ မူၺ့်ယႃႈမဝ်းၵမ် ၼႂ်းဝၢၼ်ႈဢိူင်ႇၽႂ်မၼ်း တေလႆႈတူင့် ၼိုင်ၵူတ်ႇ ထတ်းၵႂႃႇ ၊ ႁႂ်ႈႁၵ့်သႃ ထိင်းသိမ်းပႃႇမႆ့ ၊ လိူဝ်သေၼၼ့် ၵေႃႈ ၵွပ်ႈထိုင်ၶၢဝ်း တေၶိုၼ်ႈႁဵၼ်းလူင် ပွင်ၸိုင်ႈမၢၼ်ႈ ယဝ့် ၼႆ လႄႈ တိုၵ်းသူၼ်းႁႂ်ႈပေႃႈမႄႈလုၵ်ႈဢွၼ်ႇ ဢဝ်လုၵ်ႈလၢင်းၽႂ်မၼ်း ၵႂႃႇပွႆႇသွၼ် ၶိုၼ်ႈႁဵၼ်း ၸဵမ်ၸိူဝ်းၼႆ့ ။
တီႈၼႂ်းပၢင်ၵုမ်ႁူပ့်ထူပ်း ၵူၼ်းမိူင်းၼၼ့် မီး ၽၢႆႇဢုပ်ႇပိူင်ႇ ၼႂ်းၸေႈဝဵင်း မၢႆ (10) လႄႈ ဢိၵ်ႇတင်းပေႃႈမႄႈၵူၼ်းမိူင်း မိူၼ်ၼင်ႇ ဢိူင်ႇတူၼ်ႈၵႅင်း ၊ ဢိူင်ႇမေႈႁၢၼ်ႇ ၊ ဢိူင်ႇမိူင်းၸိတ်ႇ ၊ ဢိူင်ႇၼႃးၼိဝ့် ၊ ဢိူင်ႇၼွင်မွၼ် ၊ ႁူဝ်ၼပ့်ဝၢၼ်ႈ မီး 30 ပၢႆ ႁူဝ်ၼပ့်ၵူၼ်းမီးယူႇ 893 ၵေႃ့ မႃးၶိုၼ်ႈႁွတ်ႈ ။
ၽၢႆႇဢုပ်ႇပိူင်ႇ ၼႂ်းၸေႈဝဵင်း ၵေႃ့ၵႂႃႇၶဝ်ႈႁူမ်ႈၸွမ်း ၵေႃ့ၼိုင်ႈလၢတ်ႈၼႄဝႃႈ-“ ၸႂ်ႈၶႃႈ ဢေႃႈ မိူဝ်ႈၼႆ့ ၽူႈၸတ်း ၵၢၼ်ၸေႈဝဵင်း ႁဝ်းၶႃႈ ဢွၼ်ႁူဝ်လူင်းႁူပ့်ထူပ်းၵူၼ်းမိူင်း တီႈၼႂ်ႇဢိူင်ႇ ၼႃးၼိဝ့် ပိူင်လူင် မၼ်းတႄ့ ႁဝ်းၶႃႈလႆႈတိုၵ်းသူၼ်း ပေႃႈမႄႈ လုၵ်ႈဢွၼ်ႇႁႂ်ႈ ဢဝ်လုၵ်ႈလၢင်းၽႂ်မၼ်း ၶိုၼ်ႈႁဵၼ်းလူင် ပွင်ၸိုင်ႈၵႂႃႇ ၼင်ႇႁိုဝ်လုၵ်ႈဢွၼ်ႇႁဝ်းၶႃႈ ၼမ့်ၵတ့်ပေႃးတေဢမ်ႇလႆႈ တူၵ်းတႅမ်ႇ ႁႂ်ႈၶဝ်ပေႃးတေ ၸၢင်ႈပဵၼ် တေပိုင်ႈဢိင် တႃႇႁဝ်းႁႃးမိူဝ်းၼႃႈၼၼ့် လႆႈတိုၵ်းသူၼ်းၵႂႃႇ ဢမ်ႇၵႃး ၼင်ႇႁိုဝ် မူႇဝၢၼ်ႈ ပေႃးတေမီးလွင်ႈ မူတ်းသႂ် ယုၵ်းယၢၵ်းတေဢမ်ႇလိူင်ႇ ႁႂ်ႈထိင်းသိမ်းပၼ်သၽဝႃႇ ၊ ထိင်းသိမ်းပၼ် လွင်ႈထိူၼ်ႇၶိူဝ်းပႃႇမႆ့ ယႃႇပေႇတႅပ်းမႆ့ သေ ဢိၵ်ႇပႃး ဢွၼ်ႁူဝ်လိူၵ်ႈတင်ႈပၼ် ၵေႃႇမတီႇဢိူင်ႇ ၵွၼ်းဢိူင်ႇ ၼႂ်းဢိူင်ႇ ႁၢင်ၼႃး ၸိူဝ်းၼႆ့ ၶႃႈဢေႃႈ ” ဝႃႈၼႆ။
ၸွမ်းၼင်ႇပိူင် ပေႃႇလသီႇ ပႃႇတီႇမႂ်ႇသုင်ၸိုင်ႈတႆး တပ့်သိုၵ်းၸိုင်ႈတႆး မီးၼၼ့်သေ ၵဵဝ်ႇၵပ်းၵၢၼ် ပၢႆးပိင်ႇၺႃႇ ၊ ၵၢၼ်ထိင်းသိမ်း ပႃႇမႆ့ ၊ ၵၢၼ်ၽဵဝ်ႈမူၺ့် ယႃႈမဝ်းၵမ် ၊ ဢိၵ်ႇတင်းၵၢၼ်လိူမ်ႈလႆႇ လွင်ႈမူတ်းသႂ် ၸိူဝ်းၼႆ့ ၵေႃႈ ယူႇတီႈ ၽၢႆႇဢုပ့်ပိူင်ႇ ငဝ်ႈငုၼ်း SSPP/SSA ၸိူဝ်းပဵၼ် ၸေႈတွၼ်ႈ ၸေႈဝဵင်း ၶဝ်ၵေႃႈ ဢွၼ်ၵၼ် ၶတ်းၸႂ်တူင့်ၼိုင်တိုၵ်းသူၼ်း ႁဵတ်းသၢင်ႈၽႂ်မၼ်းၵႂႃႇယူႇ ဝႃႈၼႆ။
