ၶၢဝ်ႇ-SSPP
2019 May(22)
ၽူႈၸတ်းၵၢၼ်ၸေႈဝဵင်းမၢႆ(10) SSPP/SSA ၸတ်းႁဵတ်းပၢင်ၵုမ်ၵူၼ်းမိူင်း ၼႃႈတီႈဢိူင်ႇ ၼႃး ၼိဝ်ႉ ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ တိုၵ်းသူၼ်းႁႂ်ႈလုၵ်ႈလၢင်းၽႂ်မၼ်း ၶိုၼ်ႈႁူင်းႁဵၼ်း ၵွပ်ႈၶၢဝ်းၶိုၼ်ႈႁူင်းႁဵၼ်း ၸၢမ်မႃး။
ဝၼ်းထီႉ 21.5.2019 ယၢမ်း 09:18 မူင်းတေႃႇ ယၢမ်း13:14 မူင်းၼၼ်ႉသေ တိုၵ်းသူၼ်းပေႃႈ မႄႈၵူၼ်းမိူင်း ၸိူဝ်းမီးလုၵ်ႈလၢၼ်ဢၼ်ၵိုင်ႇလီၶိုၼ်ႈႁူင်းႁဵၼ်းၼၼ်ႉ ႁႂ်ႈဢွၼ်ၵၼ်ပၼ်ႁႅင်း လုၵ်ႈ လၢၼ်ၽႂ်မၼ်းၶိုၼ်ႈႁူင်းႁဵၼ်းၵႂႃႇ ၵွပ်ႈပၢႆးပိင်ႇၺႃႇၼႆႉ မၼ်းလမ်ႇလွင်ႈတႃႇၸူဝ်ႈပၢၼ်ၵူၼ်းလႄႈ ၼင်ႇ ႁိုဝ်လုၵ်ႈလၢၼ်ႁဝ်းတေ လၵ်းလႅမ်သႅမ်းၵႃႈ၊ ၼႂ်းငဝ်းလၢႆးပၢၼ်ဝၢၼ်ႈမိူင်းလႅၵ်ႈလၢႆႈၼႆႉ ပိင်ႇၺႃႇလိၵ်ႈ လၢႆးၼႆႉ လမ်ႇလွင်ႈတႃႇလုၵ်ႈလၢၼ်ၸိူဝ်းတေပုတ်ႈတိၼ်တၢင်မိုဝ်းၵႂႃႇမိူဝ်းၼႃႈ သပ်းလႅင်းတိုၵ်းသူၼ်း ၼင်ႇၼႆယူႇယဝ်ႉ။
ၼႂ်းပၢင်ၵုမ်ၼၼ်ႉ လႆႈလိူၵ်ႈတၢင်ႇ ၽူႈဢွၼ်ႁူဝ်ၸုမ်းမႂ်ႇသေ သပ်းလႅင်းပႃးလွင်ႈၽေးၶဵၼ် ယႃႈမဝ်းၵမ်၊ လွင်ႈလူဝ်ႇႁူမ်ႈတိၼ်ႁူမ်ႈမိုဝ်း တင်းပေႃႈမႄႈၵူၼ်းမိူင်းႁဝ်း ၵႅတ်ႇၶေၽေးၶဵၼ်ယႃႈမဝ်း ၵမ်ၸိူဝ်းၼႆႉ သပ်းလႅင်းၵႂႃႇၵႂၢင်ႈၶႂၢင်ယူႇယဝ်ႉ။
ၽွင်းယၢမ်းပၢင်ၵုမ်ၼၼ်ႉ ၸိူဝ်းပဵၼ်ၸုမ်းၽၢႆႇယူႇလီၸေႈဝဵင်း ဢဝ်ပုၼ်ႈၽွၼ်း ယူတ်းယႃ တူၺ်းထိုင်ပၼ်ပေႃႈမႄႈၵူၼ်းမိူင်း ၸိူဝ်းမီးတၢင်းပဵၼ် ႁူဝ်မဝ်း၊ လိူတ်ႈၶိုၼ်ႈ၊ ႁႅင်းဢေႇ၊ ပဵၼ်လိူင် လႄႈ ပေႃႇႁိူဝ်ႉပေႃႇဢူၼ်းၸိူဝ်းၼၼ်ႉ ယူႇယဝ်ႉ။
