ၶၢဝ်ႇ-SSPP
2019 May (25)
ၼၢင်းၼမ်ႉၽိုင်ႈပၼ်းၺႃး ၵေႃႉလႆႈသူးပၢႆးသၢႆႊ Academic Contest တီႈမိူင်းဢမေႊရီးၵႃး ၼၼ်ႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢဝ်ၵုင်ႇမုၼ်ယွင်ႈယေႃး လွင်ႈၶတ်းၸႂ် မၼ်းၼၢင်း လူၺ်ႈသိုပ်ႇပၼ်ႁႅင်း ႁဵၼ်းပိင်ႇၺႃႇတၢင်းမေႃ ႁႂ်ႈပဵၼ်တူဝ်ယၢင်ႇလီတႃႇၼုမ်ႇၸၢႆးယိင်းတႆး တင်းလုမ်ႈ။
ၼၢင်းၼမ်ႉၽိုင်ႈပၼ်းၺႃး ပဵၼ်လုၵ်ႈယိင်းၸၢႆးလႃႈ+ၼၢင်းၵဵင် ႁႅင်းၵၢၼ်ယၢၼ်မိူင်း လႆႈၵႂႃႇၶဝ်ႈပၢင်ၶေႉၶဵင်ႇ ၽၢႆႇပၢႆးသၢႆႊ Academic Contest ဢၼ်ၸတ်းႁဵတ်းတီႈၽူဝ်းၼိၵ်ႉသ် ဢႃႊလီႊၸူဝ်းၼႃး(phoenix Arizona) မိူင်းဢမေႇရီႊၵၼ်ႊ ဝၼ်းထီႉ 12.5.2019 တေႃႇဝၼ်းထီႉ 17.5.2019 ၼၼ်ႉ ႁူမ်ႈၵၼ်တင်းလုၵ်ႈႁဵၼ်းထႆးသေ မၼ်းၼၢင်းၶတ်းၸႂ်ဢဝ်လႆႈမႃး သူးထီႉ(2)ၼၼ်ႉ ပဵၼ်ၼႃႈတႃ ၸၢဝ်းၶိူဝ်းတႆးႁဝ်းတင်းလုမ်ႈၼႆလႄႈ လုၵ်ႉတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဢဝ်ၵုင်ဢဝ်မုၼ် လွင်ႈၶတ်းၸႂ်မၼ်းၼၢင်း တေႉတေႉဝႃႈဝႃႈသေ ၼင်ႇႁိုဝ်တေပဵၼ်လွင်ႈၵမ်ႉယွင် တႃႇသိုပ်ႇၶိုၼ်ႈႁဵၼ်းၼၼ်ႉ လႆႈၸွႆႈငိုၼ်းထုၼ်း 300,000 ဝၢတ်ႇ ပဵၼ်သူးၶတ်းၸႂ်ၵေႃႈၸႂ်ႈၼႆယဝ်ႉ။
ၽူႈယႂ်ႇၵူၼ်းလူင် ၼႂ်းငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၸဝ်ႈၼိုင်ႈ လၢတ်ႈ ဝႃႈ“လွင်ႈဢၼ်ႁဝ်းၶႃႈၸွႆႈထႅမ် ငိုၼ်းၸရိၵ်ႈၶိုၼ်ႈႁဵၼ်း ၼၢင်းၼမ်ႉၽိုင်ႈပၼ်းၺႃးၼႆႉ ၼင်ႇႁိုဝ် တေပဵၼ်တိုၼ်း တႃႇသိုပ်ႇသၢႆၸိူဝ်ႉၶိူဝ်းလႄႈသင်၊ ႁႂ်ႈပဵၼ်တႃႇၼေႃႇတႅၼ်းၶိူဝ်း ၸၢဝ်းၶိူဝ်းတႆးႁဝ်း လူယိူင်ႈလႄႈသင်၊ ၼင်ႇႁိုဝ်လုၵ်ႈဢွၼ်ႇတႆး ႁႅင်းၵၢၼ်ယၢၼ်မိူင်းလႄႈ လုၵ်ႈဢွၼ်ၼေႃႇတႅၼ်း ၶိူဝ်းတႆးႁဝ်း တေလူယိူင်ႈ ဢဝ်ႁဵတ်းတူဝ်ယၢင်ႇလီၼၼ်ႉ ႁၼ်ထိုင်ၸိူင်ႉၼႆသေ လႆႈၸွႆႈထႅမ်”ဝႃႈၼႆ။
ၵဵဝ်ႇၵပ်းပိင်ႇၺႃႇၵၢၼ်ႁဵၼ်းၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၵေႃႈ လႆႈတမ်းဝၢင်းပဵၼ်ၵၢၼ်လူင်သေ ပူၵ်းပွင်ႁႂ်ႈပိင်ႇၺႃႇ လုၵ်ႈလၢၼ်တႆးၶိုတ်းၸၼ်ႉ လုမ်ႈၾႃႉၼၼ်ႉ ၶူပ်ႇပီႊလႂ်ၸႂ်ႉငိုၼ်းႁူဝ်ႁဵင်သႅၼ်၊ မိူၼ်ၼင်ႇၵမ်ႉၸွႆးၸိူဝ်းမီးတၢင်းယၢပ်ႇၽိုတ်ႇ တႃႇၶိုၼ်ႈႁဵၼ်းလႄႈသင် လႆႈပိုတ်ႇဝႆႉႁူင်းႁဵၼ်းၼေႃႇတႅၼ်းၶိူဝ်း တီႈဝၢၼ်ႈႁႆးလႄႈသင် လႆႈ ႁဵတ်းသၢင်ႈၵႃႈၼင်ႇယိုၼ်းထိုင်ပွင်ပဵၼ်လႆႈ ယူႇယဝ်ႉ။
