By သႅင်ၸိုင်ႈ
October 29 ,2018
ၶွင်ႇၸီႇဢဝ်ၶိုၼ်းၸိုင်ႈတႆး (RCSS)ႄလႈ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈပဵၼ်ပၢင်တိုၵ်းၵၼ်တီႈၼိူဝ် သဵၼ်ႈတၢင်းၼမ်ႉတူႈ-လႃႈသဵဝ်ႈ တီႈႁိမ်းတၢင်းႄၽမိူင်းယဵၼ်ႄလႈ ၼႂ်းဝၼ်းတီႈလိူၼ်ဢွၵ်ႇတူဝ်ႇပႃႇ 29 ဝၼ်း ပီႊ 2018 ၼီႊၼၼ်ႉ ၵူၼ်းမူိင်းၼႂ်းဝၢၼ်ႈမိူင်းတွင် ေၸႈ ဝဵင်းၼမ်ႉတူႈမွၵ်ႈ(200)ပၢႆႄလႈ ၵူၼ်းမိူင်းၼႂ်းဝၢၼ်ႈပဵင်း၊ ဢီႇၼၢႆး၊ ၼႃးသၢႆး ေၸႈဝဵင်းလႃႈသဵဝ်ႈမွၵ်ႈ (500)ပၢၵ်ႇပၢႆ ႁူမ်ႈသဵင်ႈၵူၼ်းပၢႆႈေၽးသိုၵ်း ၼႂ်းေၸႈဝဵင်းၼမ်ႉတူႈႄလႈ ေၸႈဝဵင်းလႃႈသဵဝ်ႈမွၵ်ႈ(700) ပၢၵ်ႇပၢႆ လႆႈပၢႆႈၶဝ်ႈၼႂ်းဝဵင်းလႃႈသဵဝ်ႈ ဝႃႈၼႆ။
ၵူၼ်းမိူင်းၼႂ်းပိုၼ်ႉတီႈလၢတ်ႈဝႃႈ မႅၼ်ႈၽွင်းၸုမ်းသိုၵ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/ SSA) တိုၵ်ႉထင်သဝ်းဝႆႉတီႈၼႂ်းဝၢၼ်ႈပဵင်းယူႇၼၼ်ႉ ၸုမ်းသိုၵ်းၶွင်ႇၸီႇဢဝ်ၶိုၼ်းၸိုိင်ႈတႆး (RCSS) ၶဝ်ႈေလႃႇတိုၵ်း မႃးႄလႈ လႆႈပဵၼ်ပၢင်တိုၵ်းၵၼ်ၵႂႃႇ ၼႆယဝ်ႉ။
ၸုမ်းသိုၵ်းၶွင်ႇၸီႇဢဝ်ၶိုၼ်းၸိုင်ႈတႆး(RCSS)ၶဝ် လႆႈတိၺွပ်းၵႂႃႇ ၽူႈၵႅမ်တူဝ် ပူႇေၵႈဝၢၼ်ႈပဵင်းႄလႈ လုၵ်ႈႁဵၼ်း ၸၼ်ႉသိပ်းေၵႃႉၼိုင်ႈေသၸႅတ်ႈထၢမ်ႇယဝ်ႉ ၶိုၼ်းလၢတ်ႈဝႃႈ ေတပွႆႇပၼ်ၶိုၼ်း ၼႆယူႇ။
မုၵ်ႉၸုမ်းပရႁိတ တူင်ႇဝဵင်းလႃႈသဵဝ်ႈႄလႈ တူင်ႇဝဵင်းသီႇေပႃႉ လႆႈဢဝ်ၵႃး 10 လမ်းေသ ၸွႆႈထႅမ်ေတႃႉ တၢင်ႇသူင်ႇၵူၼ်းမိူင်းၸိူဝ်းပၢႆႈေၽးသိုၵ်းေသ ၶဝ်ႈမႃးေသႃႉႁူမ်ႈတီႈၼႂ်းဝဵင်းလႃႈသဵဝ်ႈ ၼႆယဝ်ႉ။
ယၢမ်းႁူဝ်ၶမ်ႈ ၼႂ်းဝၼ်းတီႈမိူဝ်ႈၼႆႉ သွင်ၽၢႆႇလႆႈၵုိတ်းယင်ႉပၢင်တိုၵ်းၵၼ်ဝႆႉေသတႃႉေၵႃႈ တိုၵ်ႉမီး လွင်ႈၶဵင်ႈၶႅင်တူင်ႉၼိုင်ၵၢၼ်သိုၵ်းေတႃႇၵၼ်ဝႆႉယူႇၼႆယဝ်ႉ။
