လိူၼ်ေဢႃးၵၢတ်ႉ 8 ဝၼ်း ပီႊ 2018 ၼီႊ

ၼႂ်းဝၼ်းတီႈ 07.08.2018 ယၢမ်းၵၢင်ၶမ်ႈ 8:00 မူင်းၼၼ်ႉ ၸဝ်ႈၼႃႈတီႈထႆး တိၺွပ်းလႆႈယႃႈမဝ်းၵမ် မိၵ်ႈလူတ်ႉေၶႉ 999 ဢၼ်လတ်းၽၢၼ်ႇၼမ်ႉႄမႈၶွင် ၼႂ်းၼႃႈလိၼ်သၢမ်ၸိင်ႇၶမ်းေသ ေတႃႉတၢင်ႇၶဝ်ႈ ၸူး ေၸႊမိူင်းေၼႃႊၾၼူမ် ၸိုင်ႈထႆး ဝႃႈၼႆ။

ၽိသဵတ်ႉထွင်ႊတီႊ ၽူႈၵုမ်းၵမ်ၽၢႆႇပလိၵ်ႈထႆးႄလႈ ၽူႈမီးပုၼ်ႈၽွၼ်းၽၢႆႇတပ်ႉသိုၵ်းထႆး ၼႂ်းတပ်ႉၵွင် 210 ၶဝ်ႁူမ်ႈႁွမ်းၵၼ်ေသ လၢတ်ႈႄၼတီႈပၢင်သပ်းလႅင်းၸႅင်ႈၶၢဝ်ႇဝႃႈ “ ယႃႈမဝ်းၵမ်ဢၼ်တၢင်ႇမႃးၼႂ်း လူတ်ႉတူဝ်ႇယူဝ်ႇတႃႇသီလမ်ဢွၼ်ႇၼၼ်ႉ တၢင်းၼမ်မီး 4,776,000 လၢၼ်ႉမဵတ်ႉေသ တိၺွပ်းလႆႈပႃး ၽူႈေတႃႉတၢင်ႇ ယႃႈဢၼ်ၸိုဝ်ႈႁွင်ႉဝႃႈ ၼူႉၼၢတ်ႉသီႇရိ ဢႃႇယူႉ 33 ၶူပ်ႇၼၼ်ႉေသ ယႃႈမဝ်းၵမ်လုၼ်ႈ ၼႆႉ ပဵၼ်သႅၼ်းလုၼ်ႈမႂ်ႇ ဢၼ်ပႃးမိၵ်ႈလူတ်ႉေၶႉ 999 ” ၼႆယဝ်ႉ။

ၸဝ်ႈၼႃႈတီႈၶဝ် လႆႈၶၢဝ်ႇလူင်ႈၼႃႈဝႆႉဝႃႈ ယႃႈမဝ်းၵမ်တင်းၼမ်တင်းလၢႆေတလတ်းၶဝ်ႈၼႂ်းမိူင်းထႆးၼႆ ႄလႈ ၽၢႆႇပလိၵ်ႈႄလႈ ၽူႈမီးပုၼ်ႈၽွၼ်းၽၢႆႇတပ်ႉသိုၵ်းထႆး ေၸႊမိူင်းေၼႃႊၾၼူမ် လႆႈႁွမ်းမိုဝ်းၵၼ် ေသ ႁဵတ်းလွင်ႈၵူတ်ႇထတ်းၼိူဝ်သဵၼ်ႈတၢင်းလူင် မၢႆ 212 ႄလႈ မၢႆ 223 ၼၼ်ႉေသ ၸင်ႇတိၺွပ်းလႆႈ ယႃႈမဝ်းၵမ်ၸိူဝ်းၼႆႉ ၼႆယဝ်ႉ။

ယၢမ်းၵၢင်ၶမ်ႈ 8:00 မူင်း လူတ်ႉၵႃးတူဝ်ႇယူဝ်ႇတႃႇသီလမ် ဢၼ်တၢင်ႇယႃႈမဝ်းၵမ်မႃးၼၼ်ႉ ေႁႃလတ်း မႃးၼိူဝ်သဵၼ်ႈတၢင်းလူင် ၸမ်ထိုင်တီႈႁိမ်းၵိၵ်ႉလၢၼ်ႇၽၢႆႇၵူတ်ႇထတ်းမွၵ်ႈ (1) ၵီႇလူဝ်ႇမီႇတႃႊၼၼ်ႉ ၶိုၼ်းၼႅတ်ႈပိၼ်ႇႁူဝ်ၵႃးေသ ေႁႃလႅၼ်ႈပၢႆႈၵႂႃႇ ၼႆယဝ်ႉ။

ၽၢႆႇပလိၵ်ႈႄလႈ ၽူႈမီးပုၼ်ႈၽွၼ်းၽၢႆႇတပ်ႉသိုၵ်းထႆးၶဝ် လူင်ႈၼႃႈတတ်းတၢင်းဝႆႉယဝ်ႉႄလႈ ဢမ်ႇတၼ်း ေႁႃႈၶၢမ်ႇပူၼ်ႉေသ လႆႈၵုိတ်ႉလူတ်ႉၵႃးဝႆႉတီႈႁိမ်းၶၢင်ႈတၢင်း။ ၵူၼ်းၸိူဝ်းဢၼ်ၼင်ႈလူတ်ႉမႃးၼၼ်ႉ လႆႈဢွၼ်ၵၼ်လူင်းလူတ်ႉၵႃးေသ လႅၼ်ႈပၢႆႈၶဝ်ႈထိူၼ်ႈၵႂႃႇႄလႈ ၽၢႆႇတပ်ႉသိုၵ်းထႆးၶဝ် လႆႈဢွၼ်ၵၼ်လမ်း သွၵ်ႈတဝ် ထူပ်းႁၼ်ၼၢင်းယိင်းေၵႃႉၼိုင်ႈ တိုၵ်ႉမူၵ်းပသိူင်ႇပႅပ့်တူဝ်ဝႆႉၼႂ်းယူမ်းႄလႈ ၽူႈမီးပုၼ်ႈၽွၼ်းၶဝ် လႆႈတိၺွပ်းဢဝ်တူဝ်ၵႂႃႇ ၼႆယဝ်ႉ။

တီႈၼႂ်းပၢင်သပ်းၸႅင်ႈၶၢဝ်ႇၼၼ်ႉေၵႃႈ ၽူႈမီးပုၼ်ႈၽွၼ်းၶဝ်လၢတ်ႈဝႃႈ “ တီႈၼႂ်းမၢႆၾၢင်ေယးငိုၼ်း (ဢၵွင်ႉပၢၼ်ႇ)ၶွင်ၼၢင်းယိင်းဢၼ်တၢင်ႇယႃႈမဝ်းၵမ်မႃး ၵႃႈၶၼ်ႁူဝ်ၼပ်ႉငိုၼ်းထႆးမွၵ်ႈ 900 လၢၼ်ႉ ၼၼ်ႉ မီးဝႆႉသဵၼ်ႈမၢႆငုိၼ်း ၼပ်ႉႁူဝ်လၢၼ်ႉဝၢတ်ႇမၼ်းႄလႈ ၵူၼ်းၵႃႉယႃႈဢၼ်ဢဝ်တူဝ်လွတ်ႈၵႂႃႇၸိူဝ်း ၼၼ်ႉေၵႃႈ ေတၶိုၼ်းသိုပ်ႇလမ်းလိုပ်ႈသွၵ်ႈႁႃ ႁႂ်ႈထူပ်းႁၼ် ” ၼႆယဝ်ႉ။

တႅမ်ႈၶၢဝ်ႇ – မွၵ်ႇၶမ်းၶူင်း